Transcript of Grace Poe's Interview

dzMM with Ted Failon

Ted Failon: Ma'am senator, nagkaroon po kayo ng hearing kamakailan tungkol nga po dito sa naging problema po ng water supply natin sa coverage area ng Manila Water at Maynilad. Una po, anong inyong reaksyon sa naging desisyon ng MWSS board - hindi po ng regulatory office - sa sinasabing ipapataw na penalties sa Manila Water Ma'am?

Sen. Grace Poe: Dapat naman talaga na mayroong multa na ipapatong sa kanila dahil nga sa natamo ng ating mga kababayang paghihirap. Pero ang tanong ko lang, P534 million ang multa, tapos P600 million ang kukunin din nila para sa new water source. So ano pong ibig sabihin nito, sabi ko, 'yun bang new water source na 'yan ay multa rin, sapagkat hindi ba talagang responsibilidad rin naman ng nagbibigay sa atin ng tubig na maghanap ng pagkukunan niyan. Mabuti naman na iniisip na nila 'yan, pero siyempre, sa ngayon, marami tayong mga iniisip: halimbawa, sabi ng Manila Water, pagdating ng Abril ay madadagdagan na ang suplay sapagkat doon sa Cardona treatment plant nila ay magiging 100 percent na sigurong operational o mas makakadagdag ng ilang milyong galon ng tubig. So 'yun ang dapat nilang linawin, kasi maganda naman na magbabayad sila ng multa, maganda rin na magbibigay sila ng refund, pero ang tanong din naman natin ay hanggang kailan tayo magkakaroon ng water interruption kasi hanggang ngayon meron pa rin 'yan.

Failon: Ang inyo pong hinihingi ay mas detalyadong paliwanag.

Poe: Oo, kasi papaano nila naisip na ganun ang halaga ng multa at papaano nila naisip na ito ang kailangan para magkaroon ng susunod na pagkukunan ng tubig. Ang sa akin, ayaw naman natin na 'yung ibabayad ng Manila Water ay, sa kalaunan, sisingilin sa atin, lalo na 'pag naghahanap sila ng panibagong mapagkukunan ng tubig. 'Yung isa kasing solusyon, 'yung pagtatayo ng Kaliwa Dam, magandang pakinggan na magkakaroon ng isa pang dike na pagkukunan ng tubig, pero alam niyo po, napag-usapan naman natin na medyo malaki ang interes na babayaran natin sa mga Tsino 'pag kinuha natin ito. Pangalawa, mayroong isang lehitimong pag-aaral na ginawa ng kumpanyang Hapon, na sa tingin ko ay mas mura; at pangalawa, mas hindi makakaabala sa ating kalikasan doon sa lower dam imbes na doon sa upper dam ng Kaliwa Dam. Medyo mahirap intindihin kung i-eeksplika natin pero ang puno't dulo po nito, hindi po maapektuhan ang magandang lugar doon sa Quezon; at mas mura pa sa atin kung sa Hapon natin kukunin. Kaya siguro, palipasin na lang muna natin po itong eleksyon, pero sa long-term solutions, kailangan po nating pag-aralan, na ang solusyon ba natin ay talagang makakabuti o makakasama sa atin.

Failon: Yes ma'am, well said po. Inyo hong nabanggit po ang halalan, hopefully po tayo po ay muli pong maluklok sa Senado. Ang akin lang, binanggit niyo ho 'yung Kaliwa Dam sa China; if you think of it, it's only P6 billion, if you compute it in peso. Ma'am, ang kanilang hinihinging budget ngayon ng administrasyon ay P4 trillion, bakit ka naman uutang lang ng P6 billion e kaya mo naman 'yan mismong ikaw na ang gumastos. Bakit ka pa uutang ng P6 billion e ang pinag-uusapan natin, pagkalaki-laking pera ng gobyerno. Sa 'Build, Build, Build' na lang natin, 'di ba, bakit ka pa uutang e kaya mo naman 'yan na ikaw na lang ang gumastos.

Poe: Alam mo, ngayon na nabanggit niyo 'yan, oo nga ano, kasi 'yung P6 billion kaya natin. Siguro, ang mas nakakatakot pa po dito ay kunyari, naging pabaya tayo, hindi natin nabayaran, mayroon pong probisyon kasi diyan na 'yung patrimonial rights natin ay magiging kanila. Mahirap kasi 'pag banyaga ang mayroong control doon sa ating tubig kasi puwede nilang taasan ang singil o kaya baka naman sa tingin nila ay kanila na 'yon. Hindi ko nga maintindihan kung ano ang ibig sabihin no'n, kaya alam mo, 'di ka pasisiil,' kailangan medyo mag-iingat po tayo sa ating pinagkakautangan.

Failon: Yes Ma'am, well said po. Again, 'yun pong aking na-obserbahan, bakit maliit lang na halaga, sorry po sa maliit ha, kasi ang pinag-uusapan po natin ngayon dito ay this year, P3 trillion; next year P4 trillion na budget, hindi ka pa ba makakapagbalato ng P6 billion sa isang napaka-importanteng proyekto 'di ba.

Poe: Tama po, tama. At saka maraming nagbibigay ng proposal, halimbawa, 'yung sa Wawa Dam, mayroon ding proposal diyan ang isang grupo, so mayroong mga iba't ibang solusyon na hindi naman tayo kailangang maging alipin sa isang bansa na alam naman nating napakalaki rin ng interes sa atin. Pero nais ko lang ding sabihin, Manong Ted, itong Manila Water, 22 taon silang nagbigay ng serbisyo na at least hindi naman tayo nagkulang kahit papaano sa tubig, kaya nga gusto lang nating malaman, anyare dito sa pagkakataon na ito? Ako kasi, speaking from experience, dito sa lugar ko, kanina nga po, alas-kwatro ng umaga ay maliligo sana ako, walang tubig. So kailangan po talaga siguro na magbigay ng solusyon. Hindi lamang po 'yung refund na P500 milyon na matatangap ng ating mga subscriber, marinig rin natin mismo sa Manila Water na sa darating na mga araw ay magiging regular na po ang suplay ng tubig.

Failon: 'Yan po ang maganda kong napakinggan this morning, na ang isang public official, nararanasan niya ang nararanasan po ng pangkaraniwang mamamayan. Really Ma'am, from the heart, gano'n po talaga dapat. Para ka mas kumilos para sa bayan, dapat paminsan-minsan, maranasan mo ang nararanasan na pangkaraniwan ng ating mga mamamayan araw-araw. Kaya dito sa usapin nitong terminal ng bus na gusto nilang galawin, ang akin lang diyan, subukan ninyong mag-commute kung gaano kahirap. Dapat maranasan 'yan ni Art Tugade, sorry po, sorry. Sige ma'am, baka maliligo na kayo.

Poe: Salamat po, Manong, at sa lahat ng nakikinig.

Failon: Salamat po ma'am, thank you po, mabuhay po kayo.

Poe: Okay, magandang umaga po.