Press Release
July 30, 2014

Transcript of Sen. Grace Poe's Bombo Radyo Cebu interview
Hosted by Mr. Marcho Lucabon

Bombo Marcho: Senador Grace Poe, magandang umaga. Welcome po sa ating programa, Bombo Hanay Bigtime.

Sen. Grace Poe: Good morning Bombo Marcho at sa lahat po ng nakikinig, maayong buntag po.

Bombo Marco: Maayong buntag din po, Senadora. Kamusta ang parang bakasyon po sa Senate?

Poe: Okay naman po pero siyempre, nag-umpisa na naman ang ating trabaho talaga na dapat tutukan natin 'yung mga bagay-bagay na maramdaman ng ating mga kababayan.

Bombo Marcho: I want to congratulate you on the first note po Senadora, kasi isa kayo sa mga tinitingala ngayon ng mga Pilipino, ng taumbayan, at sa mga nakaraang survey, isa po kayo sa mga pagpipilian po as future president of the Republic of the Philippines?

Poe: Naku Bombo Marcho, wala naman talaga akong plano diyan. Alam 'yan ng aking mga kapamilya at mga kaibigan, hindi ko 'yan pinaplano kasi nakita ko kung gaano kahirap tumakbo sa pagka-pangulo at nakita din natin kung gaano kahirap 'yung dinaranas ng ating pangulo ngayon. Marami pa akong dapat patunayan at marami pa akong dapat matutunan. Pero gusto kong magpasalamat sa ating mga kababayan na patuloy na nagtitiwala lalo na iyong mga kababayan natin diyan sa Cebu na binigyan talaga ako ng pagkakataon. Thank you very much at hindi ko po talaga nakakalimutan 'yan kaya nga pinag-iigihan ko rin ang aking trabaho.

Bombo Marcho: Senadora, ngayon ang unang araw ano, 'yung pormal na sesssion ay magbubukas diyan sa Congress kasi nagbukas kayo last Monday pero seremonyas lang. Ngayon ano ba 'yung ma-eexpect namin sa isang Senadora Grace Poe, ano ba kayang mga batas na iyong pagtutuunan ng pansin, Senadora?

Poe: Alam niyo Bombo Marcho, sinabi kasi ng ating Pangulo na ang kanyang agenda ay inclusive growth, ibig sabihin ang ating gobyerno ay dapat maparamdam sa ating mga kababayan ang pagbabago, ang kabutihan. So matagal ko na itong tinutulak. Gusto ko kasi magkaroon ng standard lunch program sa mga public schools natin. Siyempre, hindi nila kaagad-agad iyan pinasa sapagkat kailangang pag-aralan ng mabuti at saka medyo mahal din ang program na 'yan. Pero sa tingin ko, kung meron tayong pagtugon sa pangangailangan na pagkain ng mga bata, 'yang mga bata na 'yan, na hindi nagugutom, mas lalaki 'yan na matalino. Una yan, pero gusto ko ring maiparating sa'ting mga kababayan na kahit hindi pa naipasa ang batas na iyan, ipinaglaban ko 'yan sa budget. Para sa budget ng DepEd na at least iyong mga malnourished kids natin, iyong severely wasted ay magkaroon ng pagkain sa kanilang eskwelahan. Kaya iyan po ay kasama na rin sa budget ng DepEd na maibibigay ito sa school year na ito. Kasama rin sa programa kasi ang pinag-aaralan ko ay ang programa ng isang fast food chain, hindi ko sasabihin ano, pero sa Busog Lusog, nag-partner po ako dito sa ibang eskwelahan, nakita ko po kung papaano nakakatulong sa mga bata talaga ang pagkain, una 'yan. Pangalawa, itutulak ko ang mga lehislasyon ko at mga resolusyon ko tungkol sa mga magsasaka kasi sila talaga 'yung pinakamahirap sa ating bayan tapos lahat tayo kumukuha ng pagkain sa kanila, at ang benepisyo ay napakaliit. At ang dami pa nga dito sa Maynila, alam siguro 'yan ng mga kababayan natin diyan, na dito sa Region 4 ay mayroon 'yung cocolisap problem. Hihintayin pa ba natin na makakarating pa diyan sa Visayas ang problema na 'yan? Dapat talaga sugpuin na 'yang peste na 'yan.

Bombo Marcho: Yung problema natin Senadora, yung sa Department of Agriculture, yung sa pagsasaka talaga. Isa sa mga news na nakarating sa amin dito sa Cebu ay talagang ikaw yung isa sa pinakamatapang na nagmungkahi ukol sa pagtaas ng presyo ng bawang at sibuyas. Isa sa mga nakita mo ay yung pagkumpol-kumpol ng mga hoarders ng bawang at sibuyas. Ano po ba ang update?

Poe: Salamat naman po sa pagpuna. Alam po ninyo kahit na mambabatas tayo, syempre mayroon din tayong pinapatakbong household bilang isang maybahay. Minsan hindi ko naman iniisa-isa lahat ng nabibili pero napapansin ko paliit ng paliit ang budget na naibibigay ko parang kaunti na lang ang nabibili, so tinanong ko, yun nga yung presyo ng bawang naging P280 per kilo. Ano ba ito, yung farm gate price at yung landed rate, napakaliit lang ng presyo pero ang tubo nila ay napakalaki. So saan na tayo ngayon, unang una kinausap na natin yung mga iba't-ibang ahensya lalong lalo na ang DTI kasi sila yung may National Price Control Board, dapat sila talaga ang nag-monitor. Ano na ang nangyari, mayroon nang pinaalis na isang miyembro ng Department of Agriculture, yung sa Bureau of Plant, dapat sa kanya pa lang ay natigil na niya yung problema. Pangalawa, ang dinig ko, may mga nag-aangkat at nagtitinda ng bawang na tinatawagan na isa-isa ng DTI ngayon. Importante iyan, pero alam mo Bombo Marcho, nakakainis kasi kailangan pa bang mag-hearing para gawin nila yung trabaho nila? E kung hindi namin ginawa yung hearing na iyan, ano nakaupo lang sila? Hindi talaga tama iyon, kaya nga ang sabi ko, hindi man trabaho ng Senado ang manghuli, trabaho ng Senado ang magbantay.

Bombo Marcho: Senadora, isa sa nakatawag pansin sa SONA ni Presidente Aquino ay yung kanyang talumpati. Siya mismo yung nagbibigay ng pansin sa pagtataas ng presyo ng bigas, kasi karamihan ng kanyang tinutukan ay yung mga hoarder. Isa sa mga talagang mabibigyan ng pagtatanong dito ay yung NFA. Kamusta naman po ang kampanya ninyo dito lalong lalo na may sponsor kayo na batas para sa ating mga kaibigan natin sa DepEd lalong lalo na sa mga bata na nagugutom?

Poe: Sa totoo lang yung NFA na iyan, talagang naging paraan iyan para manloko minsan sa tao at mangurakot kaya ang daming mga NFA cases na may mga nabubulok na bigas o kaya naman ay over importing etc. Mabuting nakatutok na rin ang Pangulo diyan. Pangalawa, ang naging focus kasi ay mag-import as opposed sa higher yield natin sa ating sariling mga magsasaka pero siguro kasi nag-iisip na yung Pangulo ng ibang paraan para macombat ang mga nag-smuggle ng bigas. Kung mag-smuggle o mag-hoard kayo, mayroon kaming NFA dito at ilalabas naming lahat iyan at tingnan natin dahil mabubulok din lahat ng hinohoard ninyo diyan. So the government just wants to make sure na merong alternatibong affordable na bigas sapagkat yun ang unang pangangailangan natin sa pagkain. Hindi ako eksperto diyan, may mga nagsasabi naman na kapag nagho-hoard ka ng bigas na ganiyan, sa international market malalaman nila, halimbawa, na bibili ka ng ganiyang karami. Minsan nakakaapekto naman sa presyo ng international market, pero basta para sa akin ang importante yung puso ng Pangulo at kaniyang pagtutok ay doon sa problemang kakulangan ng bigas, sapagkat kung hindi nakatutok diyan ang Presidente, gagawa talaga ng kung anu-anong anomalya yung mga ibang tao. So tingan natin kung mag-work itong NFA plan nila na mag-angkat ng marami, kung hindi naman mag-work edi syempre makita na rin natin ang dapat sunod na hakbang.

Bombo Marcho: Nasabi niyo po kanina na may intension kayo, may batas kayo para po makatulong sa ating mga magsasaka, ito po bang pag-aangkat ng imported rice ng ating Pangulo in combat din po sa mga iligalista, sa mga rice hoarder, hindi po ba ito makakaapekto sa local market lalung-lalo na sa ating mga local farmers?

Poe: Ako sa tingin ko po, pag gumagawa ka ng mga solusyon na ganiyan, dapat may parallel action. Mag-angkat ka, gawin mo iyan, ilagay mo sa NFA para talagang may accounting kung saan napupunta pero dapat kahit bilhin mo pa ng palugi sa gobyerno, ibig sabihin even if you buy it at a higher cost dapat bilhin mo pa rin yung mga pino-produce ng ating mga magsasaka, magkaroon ka ng subsidiya para sa kanila. Iyan ang ginagawa hindi lang ng mga bansang nakadepende sa agrikultura, just like America and Japan, talagang they have to support ang kanilang agriculture, bakit kamo?

Gawin nating example yung garlic, pag bumili ka sa China, P17 ang landed rate, pag bumili ka dito P40 per kilo yung sa ating mga magsasaka, pero kailangan mo pa ring bilhin iyan sapagkat yung ating industriya nga ng agrikultura ay napakahina. So parang binibigyan mo sila ng konting push at advantage, ok lang naman yun mga kababayan natin iyan, at kasabay ng pagbibigay ng ganun dapat bigyan mo din sila ng suporta para sa binhi at sa pataba ng lupa, hindi pwedeng sabihin mo "ay hindi, dito na lang ako bibili kasi mas mura dito eh kayo tapatan niyo yung presyo." Mamaatay talaga yung industriya at kailangan natin pagbayaran iyan ngayon sapagkat ilang dekada natin silang pinabayan. Ngayon, kung mag-uumpisa tayong magbigay ng suporta ngayon pa lang, pagdating ng mga ilang taon, makaka-compete na din ang ating mga magsasaka doon sa mga inaangkat natin lalung-lalo na magkakaroon tayo ng ASEAN Economic Community (AEC), we have to give our farmers a leg up, we have to support them because if not they will die when it comes to this ASEAN economic integration kasi lahat iyan sasabihin natin "doon na lang tayo bumili sa China mas mura doon," eh ano nang mangyayari sa magsasaka natin? So the government has to invest, kahit na malugi pa ang gobyerno sa proyektong ito, ito ay investment for the future.

Bombo Marcho: Panghuling statement na po ano ang inyong ma-imensahe niyo po sa mga tagapakinig nating mga Bisaya lalung-lalo na sa mga kaibigan nating Cebuano.

Poe: Unang-una maraming salamat sa pagkakataong ito Bombo Marhco, it's always been a tremendous opportunity to be given an interview dito sa Bombo kasi napakarami ninyong tagapakinig sa ating mga kababayan diyan sa Cebu, Daghang salamat po sa tiwala at suporta niyo sa akin. Alam niyo, isa talga kayo sa prayoridad ko sapagkat nakita ko ang malaking kontribusyon niyo sa ating bayan, sa inyong probinsya, ang inyong ekonomiya, ang inyong mga tao kaya nga po pag merong hearing, about anything that will affect Cebu as much as possible nag-aatend ako. Makakakaasa kayo sa akin na ako ay isang partner ninyo sa Senado.

News Latest News Feed