Press Release
May 4, 2014

Transcript of Sen. Grace Poe's dzBB interview
Hosted by Ms. Nimfa Ravelo

Sen. Grace Poe: Hi, magandang umaga, Ms. Nimfa. Sa lahat po ng mga nakikinig, magandang umaga po.

On the blue ribbon committee report

Nimfa Ravelo: Salamat po, Ma'am. Ma'am, napadala na po ba sa inyo yung kopya ng committee report na binuo ni Senator Guingona tungkol po sa pork barrel scam?

Poe: Opo. Naipadala na. Hindi ko pa tapos basahin. May mga katanungan ako, pero sa kabuuhan naman, sa tingin ko ay nandudoon naman sa nilalaman ng report. Pero gaya nga ng sinasabi niya, ito ay kanyang report. At hindi naman niya sinasabi na ito ay naaprubahan na ng buong komite.

Ravelo: Ma'am, are you inclined to sign the report po? Pabor po ba kayo dun sa mga rekomendasyon, kabilang po yung rekomendasyon na sampahan ng plunder case ang tatlong mga kasamahan n'yo sa senado?

Poe: Meron lang akong mga konting katanungan base na rin dun sa mga isinumiteng mga ebidensya. Sa tingin ko naman, ako ay sasang-ayon dito sa report. Susuportahan ko ito pero meron nga lang konting mga katanungan. At mas mabuting tanungin ko na lang yan mismo pag ito ay pinagdebatehan namin sa plenary.

Ravelo: Although, Ma'am sabi ay overtaken na ng events kasi may rekomendasyon na ang Ombudsman at yung sa Senado ay parang kelangan lang gawin dahil siyempre nag-iimbestiga, kinakailangan talagang may report. Pero yung actual na pagsasampa ng kaso ay napagdesisyunan na talaga ng Ombudsman na kailangan talagang magsampa ng kaso.

Poe: Totoo, tama naman po yan. Subalit nga, kapag tayo ay nasa pormalidad, kapag ang isang report ay isinumite ay talagang dapat ay may pag-sang-ayon ang mga miyembro para man lang ito ay maitago sa ating mga archives. Kung ano ang naging pasiya ng kabuuhan ng blue ribbon committee ay dapat pa ring pag-aralan at mapirmahan kung sinuman ang sasang-ayon dito.

On Napoles testifying before the Senate

Ravelo: Ma'am, ito po, dahil sa pag-usbong ng mga bagong developments, pagkatapos pong mabuo ang committee report, umuwi po si Atty. Gigi Reyes, tapos si Janet Lim Napoles nakipag-usap kay Sec. De Lima. May mga ibinigay daw pong mga impormasyon at saka listahan at meron ng mga affidavit. Ang sabi ni Senator Serge Osmena na vice chairman ng blue ribbon committee ay igigiit po nya na i-reopen yung imbistigasyon para maipatawag po si Napoles.

Poe: Alam n'yo, yun naman talaga ang position ko. Kaya naman maganda ang pagdinig sa Senado dahil hindi katulad ng mga pagdinig sa korte, sa Senado, nadidinig nating lahat, kahit mga ordinaryong mamamayan ay nakakabuo sila ng sarili nilang mga opinion. At importante yan sapagkat lahat sa atin ay pwedeng mag-udyok sa ating gobyerno na gumawa ng hakbang. Kaya kung anuman ang dapat ilabas na bago ni Ginang Napoles, sa tingin ko ay dapat ring may pagkakataon ang Senado na marinig ito. Ngayon, alam ko na siya mismo, ayaw niya na humarap pa sa Senado. Hindi ko siya masisi dahil sa Senado, kahit ano ay pwedeng tanungin. Pero kung ako ang masusunod, sabihin ko parang isang mahabang kabanata yan na importante talaga ang salaysay ni Napoles para naman kung anuman yung ating mga haka-haka tungkol dyan ay mas maging tama o mas maging basis sa mga pruweba.

Ravelo: Ang sabi po ni Senator Guingona ay gusto nyang makita ang mga affidavit para daw talagang makasiguro kung talagang may sinabi ba o magsasalita ba o hindi. Sang-ayon ba kayo dun ma'am o hindi ba mas mainam na tawagin siya para pagsalitain? Pag andyan na pagsalitain, pag di nagsalita ay di doon po natin malalaman na tikom po talaga ang bibig nya. 'Napoles list' should be made public

Poe: Para sa akin kasi, hiwalay naman ang kapangyarihan ng Senado sa ibang mga sangay ng gobyerno. Hindi naman niya kailangang ma-verify itong affidavit, lalung-lalo na mismong si Sec. De Lima ang nagsabi na meron nang sinabi si Ginang Napoles. Para sa akin, hindi na niya kailangang tingnan kung ano ba talaga, kailangan ba talaga ang mga affidavit na ito. Ipatawag na lang niya. Ngayon, kung ayaw magsalita at sabihin na nandoon na sa affidavit, di bahala siya bilang blue ribbon committee kung ano ang kanyang recommendation tungkol dyan. Pero para sa'kin, ang listahan na yan ay hindi lang pag-aari ng gobyerno, yan ay pag-aari ng taumbayan. Kung talagang ang isang taong katulad ni Napoles ay gumawa ng isang malaking kasalanan sa atin, meron din naman tayong karapatan na malaman yan. Ngayon, meron din namang mga panuntunan sa korte na pagka ito ay naisampa na dun ay hindi natin pwedeng pag-usapan at wala pa naman sa ganoong punto, sasabihin ko na pwede pa namang buksan yan.

Ravelo: Ma'am, kung halimbawang hindi mapilit si Napoles, pwede po bang si Sec. De Lima na lang ang ipatawag at sa kanya na lang hihingin yung listahan?

Poe: Oo, pwede naman. Yun nga rin ang sinabi ko. Kung si mismong si Sec. De Lima ang tatawagin, at magpakita siya dun at sasabihin niya, "pasensya na po kayo, hindi ko maipapakita dahil sa mga dahilan na ito." So for the record, pwede niyang sabihin "Bakit? Bakit hindi nya pwedeng sabihin?" Para naman maliwanagan din sa Senado at ang mga tao kung ano ba talaga ang kanyang hesitasyon kung bakit ayaw niyang sabihin ang mga nilalaman nito.

Ravelo: Ma'am, kapag hindi po inilabas ang listahan, ano po ba ang magiging mensahe nito?

Poe: Para sa akin, kapag naglahad na ang isang testigo o isang kasangkot tungkol dito at hindi mo agad nilalabas, magkakaroon ng haka-haka na ito ba ay merong itinatago pang iba o meron bang mga pinoprotektahan. Subalit ako naman kasi ay kumpyansa din kay Sec. De Lima. Sabi nga nila, ang reputasyon kasi ng isang tao ay habambuhay niyang pinapaganda yan ngunit sa isang iglap ay pwedeng madungisan. At hindi naman sa lahat ng pagkakataon ay makatarungan. Kaya siguro ay pinag-iingatan din niya na talaga bang kasangkot itong mga ito o meron lang mga political vendetta o kalabang political kaya naisama. Siguro, yun lang ang mga nakikita kong kadahilanan kung bakit nag-iingat siya. Pero habang tumatagal, nagkakaroon ng haka-haka. Mas mabuti na ilabas na ang listahan na yan. Kung saka-sakali, pwede niyang sabihing ito ay basis sa aming napag- aralan na.

Ravelo: So, pagka nandun na, doon nyo na maririnig yung explanation. Papaano po ba, on your own o susuporta kayo na ire-open yung imbestigasyon ng blue ribbon committee para ipatawag si Mrs. Napoles?

Poe: Oo, para sa akin, itong isinumite ni Sen. Guingona, kung saka-sakali dahil nga hindi kumpleto, dahil nga wala dun yung pinakakasangkot, wala dun si Gng. Napoles. Doon ba sa report ni Senator Guingona, ako ba ay sasang-ayon? Siyempre sabi mo yung mga kasamahan namin ay kasangkot dun. Totoo. Masakit pag iisipin mo. Hindi ko naman ikinakaila na mga kakilala ko yun, mga kaibigan ko rin. Pero yung aming mandato, yung aming trabaho sa gobyerno, kung ano ba talaga yung aming obligasyon at kung kami ba ay nagkamali. Sa tingin ko, mas importante yung aming pangako sa taumbayan na kahit mahirap para sa amin ay kailangan din kung ano yung ebidensya ay yun din ang aming susuportahan.

On accepting state witnesses

Ravelo: Si Mrs. Ruby Tuason, di ba po ay nandoon kayo nung nag-hearing, nung nagsalaysay siya tungkol daw sa paghahatid nya ng pera kay Sen. Jinggoy Estrada. Ngayon ay diniclare na siya ng Ombudsman na itinuring na siyang state witness, binibigyan na siya ng immunity, sang-ayon po ba kayo dito? Meron po kasing nagsasabi Ma'am na ganun pala ang magiging gawain sa gobyerno, makipagsabwatan sa pagnanakaw, tapos eventually tumestigo para makaligtas sa kaso. Nasa kanya pa yung pera o meron pang maiiwang pera sa kanya.

Poe: Para sa akin nga, wala ngang perpektong sitwasyon. Talagang biktima ang taumbayan. Sa sitwasyong ito, ginagawa na lang natin ang lahat para kung anuman ang pwede pa nating maisalba ay maisalba natin. Ako ay tiwala naman sa Ombudsman. Ang kinatutuwa ko lang sa puntong ito ay yung hindi naman lahat nang nag-aaply sa Witness Protection Program ay natanggap kaagad. Sabihin na natin ay nandyan na si Ms. Tuason, natanggap na. Binibigyan ko na lang ng tiwala ang ating Ombudsman dahil sa tingin ko naman ay mapagkatiwalaan ang ating Ombudsman na si Ombudsman Carpio-Morales. Hindi nya kaagad-agad binigyan din ng immunity yung mga iba pa na nagsusumbong, lalung-lalo na yung mga kasangkot at nagtatrabaho noon sa gobyerno. Yun yung pinakamahirap sa akin na tanggapin. Kasi ikaw mismo na nagtrabaho ka sa gobiyerno at ikaw mismo ay kasabwat. Hindi dapat ganun kabilis para sa iyo na makawala sa iyong kasalanan sapagkat doble ang kasalanan mo. Yung iyong responsibildad sa tao bilang isang kawani ng gobyerno at yung pangalawa ay yung pagkakasabwat mo dun sa pagnanakaw.

Ravelo: Mam, may text question: kayo ba o inakala nyo ba na ganyan ang papasukin nyong Senado?

Poe: Siyempre hindi. Pag sinasabihan ako, "wow ang galing nyo naman kasi kayo hindi kayo kasangkot dito." Ang masasabi ko lang ay swerte na lang talaga kami na pumasok kami dyan na hindi na kami hinaharap ng hamon na yan. Hindi naman namin dinatnan ang hamon na yan. Ngayon ang aming pagkakataon ay ang maibalik ang tiwala sa Senado at kung magagawa namin yan ay di nagampanan na rin namin ang aming trabaho.

Ravelo: Ma'am tungkol dito sa umuusbong na meron pa daw masasangkot batay dun sa listahan ni Napoles, paano nyo Ma'am nakikita na makakabangon pa ang image ng Senado?

Poe: Yun talaga ang hamon. Pinupurga natin ang sistema. Wag na tayong magtaka na yung dati nang nakilahok dyan ay napakarami. Sapagkat naging napakadali ang gumawa ng kasalanan dahil nga hindi pinapansin, hindi hinuhuli noon. So ngayon sabi nga nila, ang matitira na lang, kahit iilan-ilan, at least ay yung hindi kasangkot dyan. Pero mahirap din naman magsabi kasi nga wala ako dyan. Magiging self- serving pero yun po ang magiging bunga nito. Kung meron kang kasalanan ay dapat kang maisama dito sa report o mabigyan ng hustisya ang iyong pagkakadawit para malinis mo ang pangalan mo. Siguro naman, pag nagkaroon ng susunod na eleksyon ay magdadalawang isip ang mga tatakbo dahil nga sa bagong patakaran ngayon at bagong pagbabantay ng ating mga kababayan sa Senado.

Ravelo: Akala ko po ay magdadalawang isip na kasi wala ng pork barrel.

Poe: Yun nga yun. Totoo naman yun, di ba? Kasama na yun. Kaya nga dito sa Freedom of Information bill na ating ipinapasa, isinasama ko dyan pati na ang local government. Kaya yung Freedom of Information pati yung SALN ng local government at head of agencies ay kasama, kasi nga hindi na tayo pwedeng magtago kahit anong institution ng government na magiging mas madali ang pagnanakaw.

On EDCA

Ravelo: Nabigyan po ba kayo ng briefing ng Malacanang kasi meron kayong mga kasamahan na hindi na brief tungkol dito, merong hindi.

Poe: Madali lang naman, parang eight pages lang. Nabasa ko naman. Hindi na ako nag-briefing sa Malacanang. Maraming magagandang punto dito sa Enhanced Defense Cooperation Agreement (EDCA). Number one, andun yung pagrespeto na kailangang imbitahin sila bago sila pwedeng gumamit ng isang lugar. Pangalawa, yung modernization. Pangatlo, respect for our environment at saka environmental responsibility. Pero para sa akin may konting kakulangan. Halimbawa, unang-una, ang kanilang susundin ay ang United Nations, kung anuman yung stipulations at agreement mg United Nations in case of peaceful resolution of conflict. Ang tanong ko lang, kunwari kung may agarang nag-invade, gaano kabilis tutulong ang mga Amerikano? Dadaanin pa ba nila sa UN Resolution? Pangalawa, yung mga mamamalagi dito na mga US defense personnel, wini-welcome natin sila sapagkat sabi nga, in times of natural calamities and disaster, pwede natin silang maasahang tutulong sila at kanilang ipapahiram ang kanilang equipment. Kaya lamang halimbawang magkaroon sila ng kasalanan, criminal na kasalanan sa ating bansa, saan sila magkakaroon ng kaso? Dito ba o sa US? Sa tingin ko, yun ang hindi natalakay dito sa agreement. Pero ganun pa man, di ba yung unang Mutual Defense Treaty nung 1951, nung 2009, yung Visiting Forces Agreement, nung 2007 ay merong Logistical Forces Agreement, lahat naman yan parang wala naming conflict. Kaya lang parang may kulang lang ng konti dito sa VFA.

Ravelo: Ang sabi po ni Senator Trillanes ay magpapafile daw siya ng resolution para magpatawag ng pagdinig dito, although alam naman po namin ang stand ni Senator Trillanes, pabor siya dito at sabi niya nga, ito ay hindi isang bagong treaty kundi ito ay isang executive agreement.

Poe: Oo nga, tama. Ako rin naman. Kaya lang kung meron tayong pwedeng ihirit pa, yun bang halimbawa, paano yung liability, kung merong magkasala sa kanila, paano natin mapoprotektahan ang ating mga kababayan, ang ating mga kababaihan, halimbawa. Yun lang naman sa akin at napakahalaga rin sana nung mga ganung provision.

Ravelo: Ang sabi nga lang kanina Ma'am, eh kung naging prudent ang Malacañang na habang nagkakaroon ng mga negosasyon ay mayroong consultation sa inyo sa Senado bilang ang isang treaty-ratifying body, sana ay hind naging ganito, at delikado pa na magkaroon pa ng kaso sa Supreme Court ang EDCA.

Poe: Sa tingin ko naman ay hindi pa rin magkakaroon ng kaso. Alam mo, hindi naman dahil sa sinasabi nila na kakampi tayo ng administrasyon o Amerikano, pero aminin din natin ang sitwasyon natin ngayon na hindi rin ganun kalakas ang ating pwersa. Kahit papano, makakabawas din yan sa gastusin natin, halimbawa sa ating depensa kung meron tayong maaasahang tutulong sa atin. Kung meron tayong allocation sa defense, kung tutulong sila sa maritime defense natin, malaking bagay yun. Pero magvo-volunteer din ba sila na magbabantay halimbawa sa, yung Shoal, yung mga bagay na ganun, hanggang saan ba talaga sila tutulong sa atin? Kaya sa akin, kailangan natin talaga ang tulong ng kaibigan hindi para makipag-away sa iba kundi para lang palakasin ang sarili. Pero may bagong article na lumabas na ang Pilipinas daw ay 37th overall sa lakas ng military sa buong mundo. Kahit papaano nagulat ako dun. Hindi ko nga akalain na mapunta tayo na sasampa tayo sa top 50. Sa totoo lang.

Ravelo: Ma'am, maraming salamat po.

News Latest News Feed