Press Release
August 28, 2009

ANGARA: WIKANG PILIPINO MULA BALER HANGGANG BUONG PILIPINAS

Ngayong araw pinangunahan ni Senator Edgardo J. Angara ang awarding ng Gawad Sagisag Quezon, Surian sa Sanaysay, at Dangal ng Wikang Filipino sa Century Park Hotel kasama ang Komisyon sa Wikang Filipino bilang kabahagi ng celebrasyon ng Buwan ng Wikang Pambansa.

"Napakalaking karangalan para sa akin ang maging bahagi ako ng isang buwang pagdiriwang ng wikang pambansa. Una, palibhasa'y isa akong anak ng Baler na bayang sinilangan ng Pangulong Manuel L. Quezon, tinaguriang ama ng Wikang Pambansa kaya nakakataba ng puso na ako'y kabahagi nito hindi lamang sa dahilang ako ay senador kung hindi lalong dahil sa ako'y kababayan ni Quezon na nagmamahal at nagmamalasakit sa wikang pambansa," ipinahayag ni Angara.

Kasama sa okasyon at napaunlakan ng karangalan para sa Gawad Sagisag Quezon ay sina, Monsignor Sabino Vengco at Antonio Eduardo Nachura. Para naman sa Surian sa Sanaysay David San Juan, Robinson Cedre, Leodivico Lacsamana, Dr. Emmanuel Gonzales, Jonnabelle Asis at Irene Alis-Brillo at para naman sa Dangal ng Wikang Filipino Col. Luciano Gaboy, Luis Gatmaitan, Isagani Cruz at mga institusyong Sangay ng Panitikian, Sentrong Pangkultura ng Pilipinas at Programang Todo-todo ng DZMM.

Nito lamang Agosto 17-18, nagkaroon ng isang pambansang kumperensiyang pangwika. Ito ang maituturing na pinakamalaking kumperensiya sa kasaysayan ng wikang Filipino. Dinaluhan ito ng mahigit sa limandaang kalahok mula Batanes hanggang Jolo, Sulu. Ang mga kalahok ay mga tagamasid sa Filipino, mga guro at mga direktor ng 27 panrehiyong sentro ng Komisyon sa Wikang Filipino. Kung ang pagbabatayan ay ang bilang ng dumalo, masasabing nag-uumapaw ang mga nagmamahal sa wikang Filipino.

Idinaos ang nabanggit na kumperensiya kasabay ng pagdiriwang ng ika-400 taon ng pagkatatag ng Baler ayon sa Proklamasyon ng Pangulo Blg. 1696. Tunay na ang pinag-isang selebrasyong ito ay nagkintal ng napakagandang larawan sa kabuuan ng ating pagkabansa na wika ang tulay sa pangkalahatang unawaan at talastasan. Na ang wikang ito ang buklod ng pagkakaisa sa sambayanang Pilipino sa pagsuong sa napakaraming hamon ng panahon.

Ginagamit na ang Filipino sa iba't ibang larangan. Ginagamit na ito sa mass media, sa pamahalaan, sa batas at sa edukasyon.

"Patunay lamang na ang Filipino ay nasa yugto na ng intelektuwalisasyon, na nagagamit na ito kahit sa mas mataas na antas ng gamitang larangan. At ang Filipinong ito ang sinasalita ko, sinasalita mo, sinasalita ng isang Juan de la Cruz at ng sinumang mamamayanng taas-noong ipinagkakapuring siya ay isang Pilipino," -Angara.

News Latest News Feed